Parte da familia García Rouco, Mari, Víctor de 4º de EP e Alba de 4º de EI, quixeron deleitarnos con este contacontos do album ilustrado CON LOCURA de Émile Jadoul.
En palabras da mamá da familia este é "un libro que, sen coñecer ben a intencionalidade do autor, nos parece moi apropiado para ensinar a AMAR SEN PRIVAR DE LIBERDADE. Persoalmente, o que menos nos agrada é o feito de que na contraportada o gato parece voltar á casa co peixe... pero démoslle ao autor o beneficio da dúbida."Así o faremos!
Moitas grazas por compartilo, namóranos!
Por outra banda, Antón de 6º de EI e Mercedes quixeron agasallarnos con este conto de creación propia utilizando as portadas dalgúns dos contos que teñen pola casa, unha auténtica xenialidade!
Por último, queremos compartir os BOOKFACES que non seguen chegando!
Moitas grazas a todas pola vosa colaboración e o tempo que adicades visitándonos, vós lle dades sentido ao blog :)
Como saberedes mañá 23 de abril conmemórase o Día Mundial do Libro e para celebralo gustaríanos plantexarvos o seguinte #RETO:
O reto consiste en realizar un BOOKFACE. E que é isto? Trátase de compartir unha fotografía onde a cara ou algunha parte do corpo encaixe coa portada dun libro. Aquí algúns exemplos que atopamos pola rede:
Estamos seguras de que tendes montóns de libros na casa cos que podedes xogar para crear o voso BOOKFACE! Animádevos a participar. Podedes enviar as vosas imaxes ao longo desta semana.
Tamén podedes enviarnos DEBUXOS das vosas lecturas favoritas ou FOTOGRAFÍAS lendo nos vosos recantos, e se nos enviades algunha RECOMENDACIÓN, moitísimo mellor!!
Como vos atopades? Esperamos que todas esteades ben e sigades activas coas vosas rutinas. Temos moitas ganas de saber o que estades a facer cada unha de vós! De momento, aquí vos ensinamos as primeiras mostras que non achegan ao correo do blog.
Este cartaz tan vistoso realizárono Saínza (1º EP) e Aldán (5º EI) nun cartón de refugallo, unha vella caixa de cereais; ben feito por vós! Ademáis de debuxar, fan as tarefas escolares e toman o sol preto da fiestra porque saben que TODO SAIRÁ BEN.
Aquí Amaro (4ºEI) e Estevo (1º EP) xunto co seu irmanciño traballando arreo para rematar os seus debuxos para colgar na ventá. Mentres debuxaban aproveitaron para coller toda a vitamina D que nos chega do sol. Bravo por vós!
Alfonso (3º EP), Maite e Pepa (6º EI) diante do seu cartaz, que como vedes non pasa desapercibido! Noraboa, así se fai!
Grazas por compartir o teu arco da vella, Vera! Chégannos os teus bicos!
Moitas grazas pola vosa participación. Danos moita alegría vervos tan activos; botámosvos moito de menos, e animámosvos a seguir contándonos o que facedes.
Este sábado 21 de marzo celebrouse o Día Mundial da Poesía e, Antonio García Teijeiro, un dos nosos poetas favoritos aproveitou para recitarnos algúns poemas dun do seus últimos libros Paseniño, paseniño
Lembrade que á volta poderedes atopar este libro e moitas outras obras do autor na nosa biblioteca.
Oxalá vos animades a lanzar os vosos poemas ó aire ou grabarvos para que vos escoitemos dende as nosas casas. Animádevos!
Estes días de pechamento, vemos pola ventá como outras ventás veciñas comezan a encherse con debuxos e cartaces cheos de esperanza que nos axudan a sobrelevalo. Dende o Equipo de Biblioteca e EDLG vos animamos a participar nesta iniciativa que está a levarse a cabo por todo o país e a compartir con nós toda esa arte e mensaxes positivas que estades a realizar. Será unha maneira de achegarnos ás nosas compañeiras e compañeiros que tanto botamos de menos!
Enviade as vosas fotos debuxando, dos debuxos, ou videos de ánimo ao correo do blog: ceip.practicas.corunha@gmail.com
Aquí vos deixamos un vídeo que envía Marcos de 6º de EI onde leva a cabo un experimento no que podemos ver a importancia de lavarnos ben as mans con xabón. Lembrade enxaboarvos ben as mans para espantar eses virus!
Se queredes compartir no blog algún tutorial, vídeo ou algunha imaxe vosa traballando e explicándonos as vosas rutinas destes días, podedes envialo ao correo ceip.practicas.corunha@gmail.com, recordade grabarvos ou escribirnos EN GALEGO. É importante que saibades que este correo de gmail é só para asuntos vinculados ao blog; non é o correo da escola.
Gustaríanos compartir con vós outros recursos e consellos que atopamos na rede sobre como afrontar o tema cos miúdos da casa, seguro que vos son de interese:
Aquí aparece un resumo do ben que o pasamos ese día. Non quedamos indiferentes, houbo de toda temática e variedade de disfraces, dende os máis actuais ata recopilar verdadeiras xoias de como se celebraba o entroido na zona de Paderne.
Unha vez máis, destacar a colaboración das familias na organización da festa. Degostamos os doces típicos para darnos enerxía e así troulear.
Os pequenos chefs do Ceip. de Prácticas elaboraron deliciosas receitas como
Mousse de limón, trufasde chocolate, brochetas
de froita doces …😋Mesmo tivemos convidados/as!Pero agora estreamoso novo
Taller de Cociña con un forno, un batedor e un montón de novos utensilios para
facer receitas máis elaboradas: comezamos con galletas de San Valentín! 💕 Grazas a todo o Ceip. de Prácticas por crer no
noso talento e estar sempre dispostos a probar os nosos pratos 😉
O día 30 de xaneiro é unha data na que lembramos un lema tan importante que debe estar presente nas nosas vidas. Aínda que sexa un día de conmemoración, non podemos esquecer representalo día a día.
Este ano fixémolo por partida dobre: o mesmo día
e tamén o 3 de febreiro en colaboración con outros coles:
Para que lle botedes unha olladiña, aquí vos deixo un recordo destes dous días.
O escritor madrileño Pedro Mañas Romero, galardoado cos premios máis prestixiosos da literatura infantil e xuvenil a nivel nacional, estará a mañá do luns cos alumnos de 2º e 3º de EP para falar, entre outras cousas, do libro que leron estes días.
Hoxe queremos ensinarvos algunhas das novidades que podedes coller emprestadas na biblioteca. Son contos coeducativos.
Estes contos son as sementes coas que pretendemos conseguir unha sociedade máis xusta e igualitaria. Con algúns veremos como se rompen os roles tradicionais e estereotipos sexistas, reflexionaremos sobre a corresponsabilidade nas tarefas, veremos outros modelos e referentes nos que poder mirarse e poder imitar; diversidade, tolerancia, respecto polo outro, compromiso coa defensa do máis débil... Tantos contidos interesantes e necesarios que estamos desexando que os descubrades e dean os seus froitos.
Xa podedes descargar e imprimir o calendario feito polo alumnado para este novo ano. Nel atoparedes unha acción por cada mes do ano que nos recordará cómo coidar o planeta. Tomemos boa nota e traballemos nos nosos hábitos diarios para loitar contra o cambio climático.
